ԿԵՐԱԿՈՒՐ ՊԱՏՐԱՍՏԵԼԻՍ ԽՈՀԱՐԱՐԻ ՏՐԱՄԱԴՐՈՒԹՅՈՒՆՆ Է ԿԱՐԵՎՈՐ. ԱՐՄԵՆ ՈՒՍՅԱՆ

Արմեն Ուսյան

30-ամյա խոհարար Արմեն Ուսյանն արդեն ունի 10 տարվա խոհարարական փորձ: Խոհարարի մասնագիտություն ստացել է  Ռուսաստանում: Սկզբում աշխատել է  «Եվրասիա» ռեստորանում, հետո նաև  Սուրգուտի «Комбинат восточных изделий»-ում: Վեց տարի աշխատել է Երևանի «8-րդ հրաշալիք» ռեստորանում, հետո հրավիրվել է Դուբայ և աշխատել  «Մաֆ» ակումբում: Վերադարձել է Երևան  և այժմ «Ֆերրարա» կինոակումբի խոհարարն է:

Արմեն Ուսյան. «Դեռ մանկուց սիրել եմ խոհարարությունը: Խոհարարությունը գեներով է ինձ փոխանցվել: Պապս և մայրս նույնպես երկար տարիներ աշխատել են որպես խոհարար: Ես սիրով պատրաստում եմ ամեն  ճաշատեսակ: Խոհարարությունը շատ հետաքրքիր և միևնույն ժամանակ  բարդ մասնագիտություն է: Կերակուրն ինքնին հետաքրքիր է , պարզապես այն պետք է ճիշտ պատրաստել: Պատրաստելիս հատկապես կարևոր է խոհարարի տրամադրությունը: Եթե այն բարձր չլինի, կերակուրը համեղ չի ստացվի: Աշխատանքի ժամանակ ինքս իմ հանդեպ շատ խիստ եմ, բայց և այնպես, կախված տարբեր հանգամանքներից, լինում են օրեր, երբ կերակուրը ցանկացածիս պես չի ստացվում: Խոհարարության մեջ պետք է և΄ ցանկություն, և΄ շնորհք: Մասնագիտական գաղտնիքները  չպետք է թաքցնել: Այն ուտեստների պատրաստման ձևը, որոնք համեղ են ստացվում, ես սիրով փոխանցում եմ բոլոր  ցանկացողներին: Մի քանի խորհուրդ մեր տնտեսուհիներին: Որպեսզի տախտակը չսահի սեղանի վրա, նրա տակ թեթևակի խոնավ սրբիչ դրեք: Սոխը տապակեք առանց թավան կափարիչով ծածկելու, որովհետև եփված սոխն ավելի շուտ է թթվում, քան տապակածը: Ֆրի պատրաստելիս աղ մի օգտագործեք. այն փչացնում է թե ֆրիտյուրը, թե ձեթը: Միսը տապակելիս բուսայուղի հետ մի կտոր կարագ գցեք. Այդպես միսը չի չորանում: Դանակ ընտրելիս հիշեք. լավ դանակը յուրահատուկ զնգոց է արձակում դիպչելիս: Առաջարկում եմ մեր ակումբի ֆիրմային ուտեստը` խոզի մսով «Լոտոս»»:

Արմեն Ուսյանի բաղադրատոմսը

Խոզի միս- 150 գ,

հավի միս – 150 գ,

տավարի միս- 150 գ,

սոյայի սոուս- 2 ճ/գ,

կարմիր կծու պղպեղ – 2-3 գ,

սև պղպեղ – 2-3 գ,

աղ – 2-3գ

լիմոնի թարմ քամած հյութ- 1 ճ/գ,

մայոնեզ – 2-3 ճ.գդ.,

քերած պանիր – 2 ճ. գդ,

շամպինիոն – 100 գ,

բուսայուղ, կարագ,

սոխ – 1 գլուխ,

ընկույզ – 1 թ.գդ.

Տավարի, հավի, խոզի մսի կտորներն այնպես ընտրել, որ մոտավորապես նույն չափն ունենան, ավելի մեծ կտորը`խոզի միսը: Թակել մսի կտորները, վրան քսել մայոնեզ, սոյայի սոուս, կիտրոնի հյութ,աղ, պղպեղ անել, դնել մի կողմ: Մեկ փոքր գլուխ սոխը շատ մանր կտրատել կամ քերել: Շամպինիոնը մանր կտրատել:  Սոխը տապակել, երբ ոսկեգույն դառնա, ավելացնել սունկը: Կարմիր պղպեղ, աղ, սև պպեղ ցանել վրան: Տապակի մեջ դնել խոզի մսի շերտը, վրան` հավի միսը, վերևում` տավարի միսը: Միջուկը դնել մսի կենտրոնում: Մսի շերտերի եզրերը հավաքել մեջտեղում, կապոցի ձև տալ, շուռ տալ և միացման տեղը դեպի ներքև դնել տապակի մեջ: Խաչաձև խորը կտրվածք անել այնպես, որ երեք շերտն էլ կտրվեն, միջուկը երևա: Մեջտեղում մի կտոր կարագ դնել, մի բաժակ ջուր լցնել: «Լոտոսը» կիսով չափ պիտի մնա ջրի մեջ: Կափարիչը փակել և եփել մարմանդ կրակով մոտ 30 րոպե: Երբ ջուրը գոլորշիանա, մսի շերտերը գրեթե եփված կլինեն: Տապակը կրակից վերցնել, դնել 250 աստիճանի ջեռոցի մեջ 5-10 րոպե, հանել, վրան լցնել քերած պանիր, աղացած ընկույզ, մեկ անգամ էլ դնել ջեռոցի մեջ, կարմրի, հանել: Ձևավորել մարոլի տերևներով, խնձորով և ֆրի կարտոֆիլով:

 

_______________
ԿԱՐԴԱՑԵՔ ՆԱԵՎ


1 Մեկնաբանություն ԿԵՐԱԿՈՒՐ ՊԱՏՐԱՍՏԵԼԻՍ ԽՈՀԱՐԱՐԻ ՏՐԱՄԱԴՐՈՒԹՅՈՒՆՆ Է ԿԱՐԵՎՈՐ. ԱՐՄԵՆ ՈՒՍՅԱՆ

  1. Անւսհ ասեց.

    Շնորհակալ եմ այսքան հետաքրքիր բաղադրատոմսեր տրամադրելու համար,ինչ որ պատրաստել եմ շատ համեղ է ստացվել….

Պատասխանել

Ձեր էլ. փոստի հասցեն չի հրապարակվելու: Պարտադիր դաշտերը նշված են *-ով