ՄԻԱՅՆ ԲԱՐԻ ՄԱՐԴԸ ԿԱՐՈՂ Է ԽՈՀԱՐԱՐ ԼԻՆԵԼ. ՌՈՒԶԱՆՆԱ ՆԱՀԱՊԵՏՅԱՆ

ՌՈՒԶԱՆՆԱ  ՆԱՀԱՊԵՏՅԱՆ

Ռուզաննա Նահապետյան. Ծնվել է 1968 թվականին: Սովորել է Սննդի արդյունաբերության տեխնիկումում, որտեղ էլ դասավանդել է ուսումն ավարտելուց հետո «Հրուշակեղենի արտադրության տեխնոլոգիա» առարկան, եղել է ուսումնաարտադրական պրակտիկայի ավագ վարպետ: 1994-2007  թթ աշխատել է Ամերիկյան համալսարանում: 2005-2008  թթ սովորել է Երևանի տնտեսագիտական համալսարանի էկոլոգիայի բաժնում:

-Մինչ օրս համագործակցում եմ այժմ արդեն Հայ-հունական տեխնիկումի հետ, ֆրանսիական ուսումնական կենտրոնի հետ, հրուշակեղենի բաժնի ավարտական հանձնաժողովների նախագահն եմ լինում սովորաբար: Խոհանոցում եմ անընդհատ, անգամ եթե այդ պահին ինքս չեմ պատրաստում: Մասնակցում եմ ուտեստի ստեղծման ողջ ընթացքին: Խստապահանջ եմ աշխատանքում, խոհանոցից դուրս եկած կերակուրը պետք է բարձր որակ ունենա: Երբեմն շատ բծախնդիր այցելուներ են լինում, ոմանք նույնիսկ ուտելիք պատվիրելուց առաջ ցանկություն են հայտնում տեսնել խոհանոցը: Դրա համար խոհանոցը միշտ անթերի մաքուր է: Հետաքրքիր է, որ այս հարցում շատ նախանձախնդիր են բժիշկ հաճախորդները: Անգամ նրանից, թե ինչ է պատվիրում, կարելի է շատ բան իմանալ մարդու մասին: Իսկ խոհարարը ոչ միայն կերակրում է, սխալ աշխատելու դեպքում կարող է վնասել, հիվանդացնել:

Այս մասնագիտության տեր մարդը պետք է բարի լինի: Գիտելիքներս սիրով կիսում եմ գործընկերներիս հետ, նաև ամերիկյան աշխատանքի համակարգից սովորել եմ մի բան. ապրել գործընկերոջ հոգսով, լինել կարեկից: Եվ բարին անպայման վերադառնում է քեզ: Ճաշ եփելը պարզունակ գործողություն չէ, այն հարկ է ընկալել իբրև յուրօրինակ արվեստ: Ուտեստի բաղադրիչները պետք է համադրելի լինեն միմյանց հետ: Կարիք չկա կերակուրը ծանրաբեռնել ավելորդ զարդարանքներով: Հաճախ ունենում ենք օտարերկրյա հյուրեր, որոնք սիրով համտեսում են մեր Գավառի գաթան, հալվան, «Խուրջինը», «Քյալագյոշը», «Ջրահարս» ձկնային ուտեստը: Հրաշալի է ընդունվում հայկական ավանդական ձուկը` եփված  խակ հոնով, խակ մոշով: Կամ կոլոնդակը` փոխինձի ընկուզապատ գնդիկներ ծիրանի կամ սալորի չրի մեջ, և գեղեցիկ է, և համեղ: Հայը հաճախ չի ճանաչում, հաճախ էլ հավուր պատշաճի չի ներկայացնում մեր ավանդական խոհանոցը: Աշխատելու ընթացքում շատ բան ես սովորում, բացահայտում: Մի քանի փոքրիկ գաղտնիք կբացեմ ընթերցողներին: Որպեսզի միսը հեշտ եփվի, փափկի,  հաճախ օգտագործում են գարեջուր: Նույն ձևով էլ կարելի է մի քանի վայրկյան մսի վրա լցնել կիվիի քամած հյութը, հետո լվանալ և եփել: Կանաչու տեսքը թարմացնելու համար մի քանի վայրկյան այն պահեք քացախաջրի մեջ: Առաջարկում եմ «Խուրջին» հայկական ուտեստի բաղադրատոմսը:

Բաղադրիչներ.

հորթի միս – 130 գ,
սոխ – 0.5 գլուխ,
ձիթայուղ,
սպիտակ գինի – 1 ճ.գդ.,
աղ, սև պղպեղ,
լեչո – 1-2 ճ.գդ,
սերուցք – 1 ճ.գդ.,
քաղցր կարմիր պղպեղ – 0.5 հատ,
կծու պղպեղ – ըստ ճաշակի,
խառը կանաչի – 1 թ.գդ.,
չորացրած ծիթրոն – մի պտղունց,
լավաշ – 1 հատ

Թավայի  մեջ բուսայուղ տաքացնել, հորթի միսը տապակել` մի փոքր ջուր ավելացնելով: Կափարիչը փակել: Երբ միսը գրեթե պատրաստ լինի, սոխը մանր շերտատել, լցնել մսի վրա: Մի քիչ ձիթայուղ ավելացնել, լցնել գինին: Պղպեղը մանրացնել, ավելացնել տապակվող մթերքի վրա, աղ, պղպեղ անել: Ավելացնել նաև լեչոն և սերուցքը: Երբ բանջարեղենը եփված լինի, ավելացնել մանրացված խառը կանաչին: Մեկ «խուրջինի» համար վերցնել կես լավաշ, երկու կողմից հալած կարագ քսել վրձինով: Մեջտեղում դնել ծալված լավաշի շերտ, որը կկլանի ավելորդ խոնավությունը: Կենտրոնում դնել արդեն պատրաստի միջուկը, վրան մի քիչ չորացրած ծիթրոն ցանել: «Խուջինի» ծայրերը հավաքել դեպի կենտրոն, կապոցի տեսք տալ: Փակված վիճակում նույնպես կարագ քսել, 10 րոպեով դնել 180-200 աստիճան տաքացված ջեռոցի մեջ: Մատուցել տաք վիճակում: Ուտեստի պատրաստումը  խոհարար Ագնեսա Սարգսյանի կողմից` armmenu-ի ֆոտոշարքում:

_______________
ԿԱՐԴԱՑԵՔ ՆԱԵՎ